Esta é unha receita típica que uso cada vez que teño soia texturizada e que fun mellorando ao longo dos anos. A forma “clásica” de preparar a proteína texturizada é poñéndoa en remollo e logo adobándoa ao gusto (e tamén podedes facela así, simplemente usando os ingredientes desta receita como adobo), pero grazas a este post de Creativegan (blog de cociña moi recomendado) entereime desta forma de facela, que para o meu gusto queda moito mellor.
Receita
- Cociña: galega
- Tipo de prato: principal (ou tapa)
- Dificultade: media 🟡
- ⏱️ Tempo: ~25 min
Ingredientes
(Cantidades para dúas racións, máis ou menos, dando por feito que se acompaña con algo)
- 100 g proteína texturizada grosa
- 1/2 vaso (100 ml) viño branco
- 1/2 pastilla (5 g) caldo de verduras (ou, se tes caldo xa feito, botalo directamente en lugar de auga)
- Aprox. 1 vaso e medio (300 ml) de auga (ou caldo, se non o tes en pó ou pastillas)
- 1 culler grande fume líquido (substituíble por salsa de soia + pimentón afumado)
- Especias:
- 1 culler peq. pimentón afumado
- 1 culler peq. romero
- 1 culler peq. cebola en pó
- 1 culler peq. allo en pó
- Pementa ao gusto
- 2 ou 3 dentes de allo
- Aceite para fritir
Instrucións
- Cubrir o fondo dunha sartén con aceite e quentar.
- Botar a proteína texturizada e fritila a fogo medio-alto, removendo ata que colla unha cor dourada (coidado, é fácil que se queime ao non estar hidratada).
- Engadir o viño, o fume líquido, e as especias, e deixar que reduza un pouco durante uns minutos. Se estás usando caldo en pó, podes botalo xa aquí xunto ás especias.
- Cando o líquido comece a escasear, botar unha pouca de auga (ou caldo). Baixa a fogo medio e deixa que reduza. Repite este paso cando o líquido volva a escasear, e remove de vez en cando para que as especias se mesturen ben e tamén sexan absorvidas pola proteína.
- Unha vez gastada a cantidade de líquido que aparece nos ingredientes (deberían ter pasado uns 15–20 minutos), a proteína debería estar lista para comer. Aínda así, eu recomendo probala e, se segue estando demasiado dura, repetir o paso anterior ata que teña unha textura que che guste. Para este prato recomendo non abrandecela de máis.
- Tras os pasos anteriores, a sartén non debería ter case líquido. Se aínda queda, podes reducilo máis ou retiralo a man (pero non o botes fóra, que está rico e serve de salsa) para continuar cos últimos pasos.
- Pica os dentes de allo e bótaos na sartén.
- Volve cubrir o fondo da sartén con aceite, e frite todo a fogo alto durante 2–3 minutos. Desta forma, o exterior da proteína collerá unha textura máis crocante e un mellor sabor. Despois disto, está listo para servir.
Notas
- A proteína que uso eu é a de soia. As outras que probei quedan demasiado brandas para o meu gusto.
- Podes facelo perfectamente coa técnica típica de deixar a proteína a remollo e logo adobar e fritir. Simplemente non quedará coa mesma textura. Nese caso, deixa a remollo a proteína con todos os ingredientes líquidos durante mínimo 30 mins, despois escúrrea e aprétaa para liberar o exceso de líquido, e finalmente adóbaa coas especias e frítea.
