Daenvil

Hoxe tráiovos a miña versión dos pasteis de nata! perfeccionada ao longo de numerosos intentos, e orixinalmente baseada nesta outra receita, a cal está moi boa pero queda algo lonxe do sabor e textura característicos que atoparías nuns verdadeiros pasteis de nata. Nesta receita fun incorporando ingredientes e técnicas que imitan mellor a crema da receita orixinal.

---

Receita de Pasteis de Nata Veganos

Versión vegana dos clásicos pasteis de nata portugueses.

• Cociña: portuguesa 🇵🇹
• Tipo de prato: sobremesa 🍰
• Dificultade: media 🟡
• Equipamento necesario:
  • Moldes de pasteis de nata (ou de magdalena, ou calquera similar) e un forno
• ⏱️ Tempo: ~1 h 45 min (reducibles a só 45 min)
  • Cociñando: ~20 min
  • Esperando: 1h e 25 min (1h é opcional)

Ingredientes:

(Cantidades para uns 16 pasteliños)

Para a crema:

• 250 g leite vexetal
• 250 g nata vexetal (ou a mesma cantidade de leite)
• 40 g maicena
• 50 g azucre
• 2 culleres peq. cúrcuma
• 2.5 culleres peq. esencia de vainilla (ou 1 vaina de vainilla)
• 1 culler peq. canela en pó (ou 1 rama)
• Casca de medio limón

Opcionais para a crema:

• 2 culleres peq. salsa de tomate (tomate frito)
• 1 culler peq. levadura nutricional
• Un chisco de sal negro
• Un chisco de mostaza

Para os pasteis:

• 500 g masa follada
• Margarina ou aceite (para engrasar os moldes)

Instrucións:

1. Nunha pota, quentar ata ferver todos os ingredientes da crema excepto a maicena e un pouco do leite (medio vaso). Remexer frecuentemente.
   • Se estás usando vaina de vainilla, abrila cun corte lonxitudinal e botar na mestura.
   • Se estás usando canela en rama, botala tamén enteira xunto coa casca de limón.
   • A cor resultante debería ser amarela (alaranxada se usas o tomate frito). Se non está ao teu gusto, podes experimentar a variar as proporcións de ingredientes.
2. Nun recipiente pequeno, mesturar a maicena co leite que reservaches (ou auga, se non tes máis leite) e remexer ben ata que quede homoxéneo, sen grumos.
3. Cando a pota estea fervendo, poñer a fogo lento, retirar os ingredientes sólidos que botases (cascas, ramas, vainas), botar a mestura de maicena, e remexer ben durante un par de minutos. Verás que vai espesando.
4. Despois deses 2 minutos, retirar a pota do lume e deixar repousar durante ~1 hora (opcional pero recomendado).
5. Quentar o forno a ~190 ºC e engrasar os moldes.
6. Enrolar a masa follada e cortar en rolos pequenos, da mesma altura que os moldes. En cada molde, poñer un dos rolos de masa, metendo os dedos no centro presionando cara abaixo e cara as paredes do molde, para abrilo e que colla a forma do molde. Normalmente é máis cómodo facelo cos pulgares mentres se suxeita o molde co resto dos dedos.
7. Verter a mestura da pota nos moldes ata enchelos uns 3/4 da súa altura, e meter no forno durante ~20 minutos. Durante o forneado, é normal que a crema infle e é posible que verta por fóra dos moldes (por iso só recheamos 3/4 do molde), así que asegúrate de ter unha bandexa ou un papel debaixo.
8. (Opcional) Despois dos 20 minutos (ou cando vexas que a masa está feita), poñer grill ou calor só dende arriba e subir a temperatura a 220 ºC durante uns minutos, para que se toste un pouco a capa superior. Vixiar para que non se queimen.
9. Retiralos do forno en canto vexas que están ao teu gusto, e listo. Deixar que enfríen (a crema baixará, se estaba inflada), e servir con canela ao gusto.

Notas:

• A cantidade de crema indicada dá para encher uns 16 pasteliños, pero un paquete de masa follada dos que compras no súper (aprox. 200-250 g) só dá para 6 ou 8, así que compra mínimo 2 paquetes, se queres aproveitar toda a crema. Aínda así, se te sobra crema, podes gardala na neveira e comer como se fose natilla.
• Os ingredientes “opcionais para a crema” son para darlle un sabor máis similar á crema orixinal dos pasteis de nata, os cales conteñen xema de ovo. Se non queres complicarte ou arriscarte, podes simplemente non usalos e os pasteis quedan igualmente ricos (terán un sabor máis a vainilla-limón).
• Neses ingredientes, o tomate parece antiintuitivo pero cumpre dúas funcións: axuda a dar un pouco de cor e de sabor (xunto aos outros ingredientes) similar á xema de ovo. Se o usas, é importante usar unha salsa ben homoxénea (eu sempre uso tomate frito do que vén en brik), usar tomate triturado ou cousas simulares vai estropear os pasteis porque non ten a consistencia adecuada para mesturarse coa crema.